省時又成雙成對回禮茶包 | 一杯創意 Yibei-Original

省時又成雙成對回禮茶包

依幾年去過好多次婚禮，成日見回禮禮物多數係蜜糖、毛巾、糖果、筷子等等，近期較常見係花茶，因為我同男友都想揀實用、男女老少都啱用的，所以都想揀花茶之類。搵資料時見到好多只係得人手包裝的茶包，要自已再加紙盒、名牌，因為我已經有好多item要自己整，所以想搵D茶包可以包裝好又有埋新人名。

食物同飲品方面我唔會搵淘寶，今次我搵依間係台灣公司，價錢按款式而定，我揀嗰款係NTD$45/包，款式係我同男友喜歡的藍色同一對兔仔，同一張單同一個收貨地址滿NTD$1,500仲免運費，經順豐空運發貨嚟香港。購物滿NTD$3,800有95折，咁啱我撞正優惠期每份茶包NTD$42，平均每份為HKD$10。如果我係香港買茶包再淘寶買包裝盒，其實價錢唔會差太遠。

一份茶包入面有一對兔仔茶包，即係可以沖兩杯，又可成雙成對，啱晒咩都話要雙數的長輩。買夠100份仲免費印名同日期，而且收貨時已經包裝好，可以少D手工、時間，送畀人又得體，另外我打算送畀嚟唔到觀禮的朋友「請飲」。如果要印名、日期半客製化，最好預早一個月前落單，又或者好似我咁5月落單，訂單揀8月先送貨，可以係優惠期買，但又可以臨婚禮前一個月先收貨，唔怕屋企無位放潮濕會變壞。仲有依種包裝好省位，比起立體紙盒無咁易壓皺壓扁，如果客人無拎走要自己回收返拎返屋企都無咁重。

另外其中一個系列仲會資助毛孩子基構，回禮同時幚助毛孩子。